อุปฺปนฺนุปฺปนฺนเก โส ชินวรมตุเล ปูชยิตฺวา อเสสํ พุทฺโธ เอโส หิ โอโส ภวติ นิยมโต พฺยากโต เตหิ เตหิ เตสํ เตสํ ชินานํ อจนมนุปมํ ปูชยิตฺวา สิเรน, ตํ ตํ ทุกฺขํ สหิตฺวา สกลคุณททํ ปารมี ปูรยิตฺถฯ โพธิสมฺภารทีปนีคาถา โส ทุกฺขขินฺนชนทสฺสนทุกฺขขินฺโน, การุญฺญเมว ชนตาย อกาสิ นิจฺจํ; เตสํ หิ โมจนมุปายมิทนฺติ ญตฺวา, ตาทีปราธมปิ อตฺตนิ โรปยี โสฯ ทานาทิเนกวรปารมิสาคเรสุ, โอคาฬฺหตายปิ ปทุฏฺฐชเนน ทินฺนํ; ทุกฺขํ ตถา อติมหนฺตตรมฺปิ กิญฺจิ, นาญฺญาสิ สตฺตหิตเมเวอ คเวสยนฺโตฯ เฉตฺวาน สีสํ หิ สกํ ททนฺโต, มํสํ ปจิตฺวาน สกํ ททนฺโต; โส จตฺตคตฺโต ปณิธานกาเล, ทุฏฺฐสฺส กิํ ทุสฺสติ เฉทเนนฯ เอวํ อนนฺตมปิ ชาติสเตสุ ทุกฺขํ, ปตฺวาน สตฺตหิตเมว คเวสยนฺโต; ทีปงฺกเร คหิตสีลสมาธิปญฺญํ, ปาเลสิ ยาว สกโพธิตเล สุนิฏฺโฐฯ ยทาภินีหารมกา สุเมโธ, ยทา จ มทฺทิํ อททา สิวินฺโท; เอตฺถนฺตเร ชาติสุ กิญฺจิเปกํ, นิรตฺถกํ โน อคมาสิ ตสฺสฯ มหาสมุทฺเท ชลพินฺทุโตปิ, ตทนฺเตฺร ชาติ อนปฺปกา ว; นิรนฺตรํ ปูริตปารมีนํ, กถํ ปมาณํ อุปมา กุหิํ วาฯ โย มคฺคปสฺเส มธุรมฺพพีชํ, ฉายาผลตฺถาย มหาชนานํ; โรเปสิ ตสฺมิํ หิ ขเณว เตน, ฉายาผเล ปุญฺญมลทฺธมุทฺธํฯ ตเถว สํสารปเถ ชนานํ, หิตาย อตฺตนมภิโรปิตกฺขเณ; สิทฺธํ ว ปุญฺญูปริ ตสฺส ตสฺมิํ, ธนงฺคชีวํ ปิ หรนฺติ เย เยฯ โส สาคเร ชลธิกํ รุหิรํ อทาสิ, ภูมาปราชิย สมํสมทาสิ ทานํ; เมรุปฺปมาณมธิกญฺจ สโมฬิสีสํ, เข ตารกาธิกตรํ นยนํ อทาสิฯ คพฺโภกฺกนฺติทีปนีคาถา |